USFOORUL JANNAH

🌹YUMNA FOUNDATION🌹

பெண்ணியமா? பெண்ணடிமைத் தனமா??
*********************************************

#அவள்.....
வசதியான குடும்பத்தில் பிறந்திருந்தாள்.நன்கு படித்து பல் மருத்துவ துறைக்கு தெரிவான நிலையில் வைத்தியர் ஒருவரை மண முடித்தாள்."தன் மனைவி உழைத்து பெருவாழ்வு வாழ வேண்டியதில்லை" என்ற மன நிலையில் மேற்படிப்பு தேவையற்றதாய் தோன்றியிருக்கலாம்.குடும்ப வாழ்வு இனிமையாய்,சகல வசதிகளுடன் இருந்தது,அதற்கு சாட்சியாய் மூன்று பிள்ளைகள்.
        
 ஊரார் கண்விழும் வாழ்வென்றும் சொல்லலாம்.அன்பான,புரிந்துணர்வான  ஒரு குடும்பம்,அதற்கு உயிர் வாழும் சாட்சி நான் தான்.

நல்ல கணவன்,நல்ல மனையாள்,நல்ல தாய்,நல்ல தந்தை அத்தனை கதாபாத்திரமும் கலந்த மேடையில் நாடகம் விடும் நேரம் ,திடீர் மாரடைப்பு கணவனை காவு கொண்டது.வெள்ளத்தால் சிதைந்து போன அழகிய ஓவியமானது குடும்பம். முழுதும் தாறுமாறாய் சேறு அப்பியிருந்தது.

      துரதிஷ்டம் அவரது சேவைக் காலம் பென்ஷன் பெற போதியதாய் இல்லை.
மறுமைக்காய் சேமித்து வைத்திருந்தமையால் குடியிருக்க ஒரு சாதாரண வீடு தவிற சொத்தென்று ஒன்றுமில்லை.

இரு குடும்ப உறவுகளும் முடிந்த மட்டும் உதவினார்கள்.இன்னொரு குடும்பத்து சுமையை தாங்கும், வைத்தியரின் செல்லப் பிள்ளைகளாய் வளர்ந்தவர்களை பராமரிக்கும் பொறுப்பை கையாள்வது சற்று சிரமம் தான் அவர்களுக்கு .யாரையும் சாடுவதும் முறையில்லை.

இலங்கையென்பது சவுதி அரேபியாவோ,கட்டாரோ இல்லை.விதவைக்கும் அநாதைக்கும் மாதாந்தம் ஒரு லட்சம் உதவித்தொகை பெறுவதற்கு.......????

பாவம் குழந்தைகளோடு சிரமப்படுகிறாளென மறு வாழ்வு கொடுக்கும் பணக்கார அரபிகளும் இங்கில்லை.
கொடுப்பதில் பிழையில்லை என சம்மதிக்கும் பணக்காரர்களின் மனைவிகளும் இங்கில்லை.

வருடமொரு முறை வரும் பெரு நாளைக்கு மாமாவோ,பெரியப்பாவோ உடுப்பு வாங்கிக் கொடுத்தார்கள்.உள்ளாடைகளையுமா கேட்கலாம்?

வீடு இருண்டிருப்பதாக சாச்சா பல்ப் வாங்கிக் கொடுத்தார்.மாத இறுதியில் வந்த மின் கட்டணத்தை செலுத்துமாறு  கேட்கலாமா?

அநாதை பிள்ளைகளுக்கு வருட தொடக்கத்தில் ஏதோ நிறுவனத்தால் புத்தகப் பொதிகளை கொடுத்தார்கள்."இரவில் திரியும் விலங்குகளின் "படம் ஒட்டி வருமாறு ஆசிரியர் சொல்லும் நாளில் நிறுவன்த்தினருக்கு போன் பண்ணத் தான் முடியுமா?

வாழ்வென்பது ஆயிரம் சுழல்களால் ஆக்கிரமிக்கப்பட்டது.

இப்படி எத்தனையோ குடும்பங்கள்,திடீர் சுகவீனம்,திடீர் மரணம் ,திடீர் விபத்துகள் என நட்டாற்றில் விடப்பட்ட நிலையில்.....
தந்தையின் பொறுப்பை சுமக்கும் தாய்மார்...
தம்பி தங்கைக்காய் போராடும் அக்காமார்.....

அன்று,"என் உழைப்பு மட்டும்  போதும்" என்று மேற்படிப்போடு உழைப்பிற்கும்  கணவரால் தடை போடப்பட்ட அவள் இன்று பாமசி டிப்ளோமா முடித்து விட்டு ஒரு பாமசியை நிர்வகிக்கிறாள்.நான்கு வருட போராட்டத்தின் பின்.தானும் பிள்ளைகளும் வாழ்வதற்காக...
----------------------------------------- ----------------------------------------- ----------------------------------------- 

பெண்கள் படிக்கவே கூடாதென்று எட்டாம் வகுப்பில்,பூப்பெய்திய போதே  அவள் படிப்பு நிறுத்தப்பட்டிருந்தால்........?

பல் மருத்துவ பட்டத்தை அவள் அப்போதே பெற்றிருந்தால்......?

விடைகளை நீங்களே அலசுங்கள்....

ஆனால் இவ்வாறான திடீர் திருப்பங்களை சமாளிக்கும் ஆளுமை பெண்ணுக்கு நிச்சயம் தேவை. கண்ட கண்ட பாடநெறிகள் தேவையா? என்பதை தாண்டி மார்க்க வரையரைக்குட்பட்ட நிலையில் மேற்படிப்பு அவசியமே.
தொழிலுக்கு செல்லாவிட்டாலும் பெண்களிடம் தகைமைகள் வளர்க்கப்படல் வேண்டும்.

வீண் ஆடம்பரம்,பெருமை,மேலதிக வருமானம் என பெண் உழைப்பது பற்றிய வாதங்களை புறந்தள்ளினாலும்  தகுந்த பொழுதொன்றில் அடிப்படை தேவைகளை பூர்த்தி செய்ய தொழிலுக்காய் வெளியேறத் தான் வேண்டும்.

குறைந்தது குடும்பத்திற்கே பூச்சி மருந்து வாங்குவதற்காகவாவது எதையோ தேட வேண்டுமே!

என்ன இப்படி சொல்கிறேன் என கோபம் வருகிறதா?அப்படியென்றால் அவர்களுக்கு வழி சொல்லுங்கள்.

பெண்கள் வீட்டை விட்டு தொழிலுக்கு போவதை #விபச்சாரத்திற்கு ஈடானதென பத்வா கொடுக்கும் யாராவது அந்த குடும்பங்களுக்கான மாற்று ஏற்பாடுகளை செய்வார்களா??

பெண் பல்கலைக் கழகம் போகக் கூடாது,உயர் தரம் படிக்கக் கூடாதென்றால் இவ்வாறான இக்கட்டான சூழலில் #ரிசானா_நபீக் காக அவதரிப்பதை தவிற வழியில்லை.

பெண் தொழிலுக்கே போகக் கூடாதென்றால்  தெருவிற்கொரு ஆழமான கிணறுகளையாவது தோண்டி வைக்க வேண்டும்,#நல்லதங்காளாகவாவது புணர் ஜென்மம் எடுக்கட்டும்.

இத்தா இருக்கும் நிலையில் குடும்பத்தை பராமரிக்க யாருமில்லையென்றால் பகலில் தொழில் புரிந்து விட்டு இரவில் இத்தா இருக்கவும் இடமளிக்கிறது உன்னத இஸ்லாம்.

நாட்டில் பஞ்சம் தலைவிரித்தாடுகிறதென்றால் களவெடுத்தவன் கைகளை வெட்ட முடியாதென்கிறது மனிதனையும் சந்தர்ப்பத்தையும் புரிந்த மார்க்கம்.

இந்த மார்க்கம் குல,கால வரையரைகளை தாண்டி மனிதன் மனிதனாய் வாழ்வதற்கான நெகிழ்வுத் தன்மைகளை உள்ளடக்கியதே,சிரமப்படுத்தி மாந்தரை ஜாஹிலிய்யத்தில் தள்ள வேண்டாம்.

படித்ததில் பிடித்தது