தாக்குதல்களும் அவற்றுக்குப் பின்னரும்
அஷ்ஷெய்க் எஸ்.எச்.எம். ஃபளீல் (நளீமி)
1. தாக்குதல்கள் கொடூரமானவை, அவற்றைக் கண்டிக்க வார்த்தைகள் இல்லை.மார்க்க அடிப்படையில் அவற்றை அனுமதிக்க முடியாது என்பது ஒருபுறமிருக்க மனிதாபிமான அடிப்படையிலும் அவை மிகப் பிழையானவை.
2. அவற்றை செய்தவர்கள் முஸ்லிம் பெயர்களில் இருந்ததற்காக அவற்றுக்கு இஸ்லாத்தின் அங்கீகார மிருப்பதாக நினைப்பது முற்றிலும் தவறு.
3. அவர்களும் அவர்களை சார்ந்தவர்களாக இருப்பவர்களும் உரிய முறையில் அடையாளம் காணப்பட்டு இந்த நாட்டிலிருந்து அந்தச் சிந்தனை வேர் பிடுங்கப்பட வேண்டும்.
அவர்களது நடவடிக்கைகளது விளைவுகள்
1. இஸ்லாத்திற்கு அவப்பெயர் வந்துள்ளது.
2. முஸ்லிம்கள் அனைவரும் பயங்கரவாதிகள் என்று பலரும் பார்க்க ஆரம்பித்துவிட்டார்கள்.
3. இஸ்லாத்தை இந்த நாட்டின் போக்கிற்கு ஏற்ப நடுநிலை நின்று நடைமுறைப்படுத்தியவர்களும் கூட வலைவிரிப்பில் அகப்பட்டு தவிக்கிறார்கள்.
4. மத்ரஸாக்கள் இஸ்லாமிய இயக்கங்கள் பலத்த சந்தேகத்திற்கு உட்பட்டுள்ளன.
5. பல வீடுகளிலிருந்து இஸ்லாமிய நூல்கள், சஞ்சிகைகள் கூட அவ்வீட்டாராலேயே தீ வைக்கப்பட்டன. அவற்றில் தீவிரவாத கருத்துக்கள் இல்லாவிட்டாலும் இது எதிர்காலப் பரம்பரைக்காக ஒவ்வொரு வீட்டிலும் பாதுகாக்கப்பட்ட அறிவு முதுசொம்களது அழிவாகும்.
6. முஸ்லிம்களது வியாபார நிலையங்களுக்கு பொருட்கள் வாங்க வரும் மற்றும் முஸ்லிம்களுடன் கொடுக்கல் வாங்கல் செய்வோரது தொகை கணிசமான அளவு குறைந்து விட்டதாக அறிய முடிகிறது.
7. முகம் மூடியிருந்த பெண்கள் எப்படி போனாலும் சாரி அணிந்த நிலையில் முக்காடு போடுகிறவர்களுக்கே அவற்றை அகற்றும் படி பலாத்காரத்தை பலாத்கார படுத்திய பல சம்பவங்கள் நடந்துள்ளன.
8. பஸ் வண்டிகள், காரியாலங்கள், கடைகள் போன்றவற்றின் கதவுகள் அருகே எந்த வகையிலும் எதிர்பாராத வகையில் ‘புர்கா’ உடன் நுழைய வேண்டாம் என்ற அறிவித்தல் ஒட்டப்பட்டுள்ளது. புர்காவை அரசு உத்தியோக பூர்வமாகவே தடை செய்துள்ளது.
9. நாட்டின் பொருளாதாரம் படுமோசமான நிலையில் ஏற்கனவே இருந்தது. தற்போது அது கழுதை தேய்ந்து கட்டெறும்பான நிலைக்கு மாறிவிட்டது.
10. முஸ்லிம் சமூகம் ஏற்கனவே கல்வி பொருளாதாரம் சமூக உறவுகள் ஆகிய துறைகளில் பாதாளத்தை நக்கிப் போய் இருந்தது.தற்போது அதன் வேகம் துரிதப்படுத்தப்பட்டுள்ளது.
11. ஊடகங்கள் துவேஷத்தை மிக மோசமாக தூண்டுகின்றன .செய்திகளில் நூறு விதமானவை தாக்குதல்கள் பற்றியும் தாக்குதல்களுக்கு பின்னால் இடம்பெறும் சோதனைகள் பற்றியுமே அமைந்திருக்கின்றன. இறந்தவர்களது உடல்கள் அடக்கம் செய்யப்படும் படங்களும் அந்த நேரம் உறவினர்கள், நண்பர்கள் அழுது புலம்பும் காட்சிகளும் காட்டப்படுகின்றன. பெரும்பாலும் வெறுப்பையும் உண்டுபண்ணும் வகையில் செய்தி அறிவிப்புக்கள் அமைவதால் பொது மக்களது மனநிலை முஸ்லிம்களுக்கு எதிராக படுமோசமாக தூண்டப்படுகிறது.
12. குறிப்பாக பௌத்த குருமாரின் ஊடக அறிக்கைகளும் கருத்துக்களும் துவேஷத்தை கக்குகின்றன. இனவாத அமைப்புக்கள் எக்காளமிட்டுச் இருக்கின்றன. அவர்கள் ‘நாம் எப்போதோ சொன்னோமே, நீங்கள் கேட்கவில்லையே’ என்று பொறுப்பான பதவிகளில் இருப்போரையும் பொது மக்களையும் நோக்கி பரிகாசமாகக் கேள்வி எழுப்புகிறார்கள். ‘மதரசாக்களை தடை செய்யச் சொன்னோம், ‘புர்கா’ வேண்டாம் என்றோம். எம்மைத் தான் சிறையில் போட்டீர்கள். இப்போது என்ன நடந்திருக்கிறது?’ என்று அவர்கள் கேட்கிறார்கள்.
13. இவற்றை பார்க்கும் பெரும்பான்மை சமூகத்தில் உள்ள நிதானமாக சிந்தித்து வந்த, முஸ்லிம்களது பக்கத்திலிருந்த நியாயங்களுக்காகவும் முஸ்லிம்களுக்கு இழைக்கப்பட்ட அநீதிகளுக்காகவும் குரல் கொடுத்த பலர் தற்போது தலைகாட்ட பயப்படுகிறார்கள்.அல்லது கொஞ்சமாகவே பேசுகிறார்கள்.என்னவெல்லாம் நடக்க வேண்டுமென்று முஸ்லிம் விரோத சக்திகள் நினைத்தனவோ அவை அனைத்தும் நடந்தேறிவிட்டன.
14. இந்த விளைவுகள் எதனையும் யோசிக்காத, முஸ்லிம் சமூகத்துக்குள் இருந்த கோடாரிக் காம்புகளான, வழிகெட்ட தீவிரவாத சிந்தனைகளுக்கு உள்ளாக்கப்பட்ட சிலர் இந்த நாடகத்தை அரங்கேற்றி இருக்க இனவாதிகள் மிக மிக சுதந்திரமாக பேசவும் நடக்கவும் அவர்கள் வழி சமைத்துக் கொடுத்துவிட்டார்கள் .
15. இதனால் நாடு ஒட்டுமொத்தமாக குட்டிச்சுவர் ஆகிவிட்டது. முஸ்லிம் சமூகம் சுமார் 200 வருடம் பின் தள்ளப்பட்டு விட்டது. ஏற்கனவே அது பல்வேறு நோய்களால் பீடிக்கப்பட்டு இருந்தவேளை இந்த சம்பவம் நிலைமையை இன்னும் மோசமாகி விட்டது.
16. முஸ்லிம் சமூகமானது பெரும் குழப்பத்திலும் அதேநேரம் பயத்திலும் இருக்கிறது. தூக்கத்தில் இருந்தவனுக்கு திடீரென கன்னத்தில் ஓர் அறை விழுந்தால் எப்படி இருக்குமோ அப்படியான நிலை இந்த நாட்டில் ஏற்பட்டுள்ளது.தர்காநகர் ,திகனை, கிந்தோட்டை கலவரங்கள் தூங்கியவன் மீது திடீரென விழுந்த அடிகள் தான். ஆனால், அவற்றைத் தொடர்ந்து நாம் எம்மை ஒழுங்குபடுத்தத் தவறிவிட்டோம். மிதவாத, நடுநிலைமையான தூரநோக்கோடு பார்க்கின்றவர்கள் உரிய முறையில் நடவடிக்கைகளை எடுக்காததன் காரணமாகவும் மூலோபாய திட்டங்களை வகுத்து குறிப்பாக இளைஞர்களை வழிநடாத்தத் தவறியதன் காரணமாகவும் இந்த நிலை ஏற்பட்டிருக்கிறது.
சில ஆலோசனைகள்
பின்வரும் ஆலோசனைகளை இந்த சந்தர்ப்பத்தில் முன்வைக்க முடியும்
1. இது ஒரு சோதனை மிக்க காலகட்டம். இதில் மிகுந்த ஜாக்கிரதையோடும் கவனமாகவும் தூரநோக்கோடு சிந்தித்தும் நாம் நடந்து கொள்ள வேண்டும். அல்லாஹ் முஸ்லிம் சமூகத்தை தண்டித்திருக்கிறானா அல்லது சோதிக்கிறானா என்பதை இனம் கண்டு கொள்வது கஷ்டமாக இருக்கிறது. சோதனை என்பது நல்லடியார்களை அதாவது நற்கருமங்களில் ஈடுபடக் கூடியவர்களை பரிசோதித்து, நன்மை வழங்குவதற்காக செய்யப்படும் ஏற்பாடுகளாகும். தண்டனைகள் என்றால் கடமைகளை உரிய முறையில் நிறைவேற்றாமல் பொடுபோக்காக இருந்து அல்லாஹ்வுடைய கட்டளைகளை நிறைவேற்றாமல் பாவங்களில் ஈடுபட்டவர்களுக்கு அல்லாஹ் கொடுப்பவையாகும்.இவற்றில் நாம் எந்த நிலையில் இருக்கிறோம் என்பதை பற்றி நாம் சிந்திக்க முடியும். சோதனை என்பது நல்லடியார்களுக்கு வரும் என்று
குர்ஆன் சொல்லியிருக்கிறது. அந்த நேரத்தில் ‘இன்னாலில்லாஹி வ இன்னா இலைஹி ராஜிஊன்’ என்று சொல்வதோடு பொறுமையாகவும் இருக்க வேண்டும் என்றுதான் அல்லாஹ் கூறுகிறான். ஆனால், தண்டனை என்று வருகின்ற பொழுது நாமாக சம்பாதித்துக் கொண்டவையாகவும் இவை இருக்கலாம். உஹது யுத்தத்தில் 70 சஹாபாக்கள் கொல்லப்பட்டு 70 பேர் காயப்பட்ட பொழுது ‘இது எந்கிருந்து வந்தது?’ என்று சகாபாக்கள் தமக்குள் கேள்வி கேட்டார்கள். அந்த நேரத்தில் அல்லாஹ் ‘அது உங்களிடம் இருந்து தான் வந்தது’ என்று சொன்னான். ‘குல் ஹுவ மின் இந்தி அன்ஃபுசிகும்’. அந்த வகையில் இந்த சூழ்நிலையானது எமக்கான தண்டனையாக தரப்பட்டதா என்றெல்லாம் யோசிக்க வேண்டியிருக்கிறது. அல்லாஹ் பாதுகாக்க வேண்டும்.அப்படியாயின் நாம் எம்மை மீள்பரிசீலனைக்கு தீவிரமாக உட்படுத்த வேண்டும்.
2. எல்லா நிலைகளிலும் நாம் அல்லாஹ்வை அஞ்சி, பாவங்களைத் தவிர்த்து, அவனிடத்திலே மன்றாடி அவனது உதவியை மாத்திரமே நாம் அடிக்கடி வேண்டி நிற்க வேண்டும்.
3. எந்த சந்தர்ப்பத்திலாவது நாம் வன்முறைகளால் வன்முறைகளை எதிர் கொள்ள முயற்சிக்கக் கூடாது. வன்முறைகள் நல்ல விளைவுகளைத் தரமாட்டாது. “மிகவுமே நல்ல முறையில் நீங்கள் உங்களுக்கு வருகின்றவற்றை (சவால்களை) எதிர்கொள்ளுங்கள்” என்று குர்ஆனில் அல்லாஹ் சொல்லிவிட்டு ‘அப்படி நீங்கள் செய்தால் எதிரி கூட உற்ற நண்பனாகிவிடுவான்’ என்று குர்ஆன் சொல்கிறது.
4. பொறுமையாகவும் சட்டத்தின் அடிப்படையில் மட்டுமே வன்முறையாளர்களை எதிர்கொள்ள வேண்டும்.எம்.எல்.ஏ.என்ற முஸ்லிம் சட்டத்தரணிகள் சங்கத்துக்கு இது விடயமாக அதிகம் உதவமுடியும்.
5. தற்போது நாட்டிலே அரங்கேற்றப்படும் துவேஷ செயல்பாடுகளை தடுத்து நிறுத்தி குறிப்பாக மீடியாக்களை நெடு நிலைமைக்கு கொண்டு வருவதற்கும் நாட்டில் சாந்தி சமாதானத்தை ஏற்படுத்துவதற்கும் அரசியல்வாதிகளும் முஸ்லிம் மீடியா ஃபோரமும் உதவ முடியும்.அவர்கள் அதிகமாக பங்களிப்பு செய்ய வேண்டியிருக்கிறது.
6. உலமாக்களை பொறுத்தவரையில் சமூகத்தை தைரியப்படுத்தி, அவர்களை நிதானப்படுத்தவேண்டி இருக்கிறது. ஏனைய சமூகங்கள் உடனான உறவை முஸ்லிம்கள் அழகாக அமைத்துக் கொள்ளும் படி சொல்லவேண்டும்.கரைந்து போகாமல் கலந்து வாழும் முறை பற்றிய தெளிவை அவர்களால் மட்டுமே வழங்க முடியும்.
7. சமூகத்தில் இருக்கின்ற பொறுப்புதாரிகளும் முக்கியஸ்தர்களும் தாமும் தம் பாடும் என்று இருந்துவிடாமல் இந்த முக்கியமான இக்கட்டான கட்டத்தில் சமூகத்தை நெறிப்படுத்தி தைரியப்படுத்தி ஒழுங்குபடுத்த வேண்டிய கடமையை அவர்கள் சுமந்து இருக்கிறார்கள்.
8. எமக்கு மத்தியில் இருக்கின்ற கொள்கை வேறுபாடுகளை பயன்படுத்தி அடுத்த இயக்கத்தவரை பழிவாங்குவதும் அந்த இயக்கம் சம்பந்தமாக மனதில் ஏற்கனவே இருக்கின்ற காழ்ப்புணர்ச்சியின் காரணமாக அவர்களைப் பற்றி மோசமான, இல்லாத தகவல்களை அதிகாரிகளுக்கு எடுத்துக் கூறி சிக்கலான நிலையை உருவாக்கி விடும் சகலரும் அல்லவைப் பயந்து கொள்ள வேண்டும்.ஜாக்கிரதையாக இருக்க வேண்டும். இது ஒற்றுமையாகவும் அறிவோடும் நிதானமாகவும் தக்வாவோடும் இக்லாஸோடும் விடயங்கள் கையாளப்பட வேண்டிய நேரமாகும்.
9.எமது சமூகத்தின் பெற்றார் தமது பிள்ளைகள் விடயமாக அதிக கரிசனை காட்டவேண்டும் என்பதை இது காட்டுகிறது.உலமாக்கள் இஸ்லாத்தின் மிகச் சரியான நடுநிலையான கருத்துக்களை பரப்ப தீவிர கரிசனை எடுத்திருக்க வேண்டும் என்பதையும் அது கூறி நிற்கிறது. இது பன்மைத்துவ சமூகம் என்பதால்.இதற்கேற்ப வாழ்வு முறை ஒழுங்குபடுத்தப் பட்டிருக்க வேண்டும். எமது சமூகத்தில் இருந்த இவ்வாறான இளைஞர்கள் சர்வதேச இஸ்லாமிய விரோதிகளது கைப் பொம்மைகளாக மாறுவதற்கு நாம் அனைவரும் காரணமாக இருந்தமையை கசப்பாக இருந்தாலும் ஏற்க வேண்டியிருக்கிறது.
10.இஸ்லாம் பற்றிய அச்சத்தத்தை உலக மக்களது மனங்களில் ஏற்படுத்த பல சக்திகள் எல்லா நாட்களிலும் வேலை செய்கின்றன என்பதையும் நாம் கவனத்தில் எடுக்க வேண்டு.
இந்த நாடு சுபீட்சமான நிலைக்குத் திரும்பவும் எல்லா இனங்களும் சகோதரத்துவ வாஞ்சையோடு வாழும் சூழல் உருவாகவும் அனத்து இனங்களோடு இணைந்து செயல்படுவோமாக!
அல்லாஹ்வே போதுமானவன்.யா அல்லாஹ் எம்மையும் எமது தேசத்தையும் அனைத்துவித தீவிரவாதங்களில் இருந்தும் பாதுகாப்பாயாக!
No comments:
Post a Comment